أحسن كوباية شاي في العالم

7:46 AM




كوباية الشاي المصري، هي من أعظم كوبايات الشاي في العالم بس لو اتعملت بمزاج وبنفس راضية، من الحاجات المهمة برضه هي الجو المواكب لكوباية الشاي يعني مثلًا لو بتشرب كوباية الشاي في الزحمة والخناقات ووجع الدماغ فهي مالهاش معنى.


من غير ما أطول عليكم، النهاردة كان ميعادي مع أعظم وأحسن كوباية شاي لغاية دلوقتي في حياتي، صحيح أنها كانت في كوباية بلاستيك والمياه ما كانتش مغلية قوي بس طعمها لا يمكن نسيانه.

الموضوع كله بدأ من بانكوك في رحلة العودة إلى القاهرة واللي كانت بدايتها أني أكون طائر وسط السحاب وشايف الرعد بـ ينور، احساس لا يمكن نسيانه أنك تكون طائر وسط الرعد والسحاب بكل ثقة وثبات. بعد كده كانت محطة الانتظار في مطار أبو ظبي، خلال التمشية في المطار شوفت حبيبي بينادي لي وبيقوللي تعالى اقولك، العظيم ماكدونالدز وطالما ماكدونالز يعني البطاطس الرهيبة.

طلبت واحد بيج تيستي وبطاطس ودول كانوا كفاية أني أكون اكثر واحد مبسوط في العالم، وبعدها الانتظار لطائرة القاهرة على خطوط مصر الطيران.

من المرات القليلة اللي أركب فيها طائرة رايحة على مصر وتكون تقريبًا فاضية وركابها قليلين، ربنا أراد أني أكون قاعد لوحدي على ثلاث كراسي، مستريح ولا أجدع business class، القعدة المريحة دي خلتني أدخل في النوم بسرعة وبكل راحة، ومن كثر النوم فوتت الأكل اللي ماكنتش محتاجه في الوقت الحالي بسبب وجبة ماكدونالدز الجميلة، شوية والجوع صحاني وجاء وقت الأكل وبعدها كوباية الشاي.

أنوار الطائرة في الوقت ده كانت مطفأة بسبب أن كل الركاب نايمين وأنا صاحي بشرب كوباية الشاي، - نادرًا لما بحب أسمع الموسيقى الموجودة على الطائرات لأنها في الغالب مش بتبقى مقنعة وذوقها مختلف شوية- المرة دي سمعت موسيقى الطائرة ومن ضمن المحطات كانت أم كلثوم (يا عيني على الصبر) هو ده الكلام وبتغني وتتألق، بالنظر في شاشة الخريطة لاقيت نفسنا طائرين في مكان فوق صحراء شبه الجزيرة العربية بالقرب من الأردن.

حاولوا تتخيلوا معايا كده، كوباية شاي مع صوت أم كلثوم وموسيقى أغانيها المميزة والأنوار الهادئة وطائر فوق الصحراء.

صحيح أن كوباية الشاي ماكانتش أفخم حاجة في الدنيا وماكنتش قاعد على أفخم كرسي اتعمل ولا طائر بأحسن وأسرع وأغلى طيارة، بس كنت حاسس أني أسعد واحد في الدنيا، أغنى واحد.
 

You Might Also Like

0 comments

Subscribe